Prej 8 vitesh gjendja shëndetësore e Hidajetit sa vinte dhe përkeqësohej. Ishte vetëm 10 vjeç kur shtylla e tij nisi të deformohej. Familja nuk e kishte kuptuar më parë, djali i tyre i vogël ishte i prekur nga sëmundja e skoliozës. Ndonëse nisën menjëherë të kryenin trajtimet e nevojshme, ato nuk mjaftonin për të kuruar Hidajetin. E vetmja mundësi për ta shpëtuar ishte kryerja e një ndërhyrje kirurgjikale, e cila mund të kryhet vetëm jashtë vendit.
Nëpërmjet borxheve familja kishte mundur të siguronte një pjesë të të ardhurave, por nuk kishte mundësi për të plotësuar shumën e plotë. Pas apelit të bërë nga “Fundjavë Ndryshe” në kohë rekord u arrit që të mblidhej shuma prej 20.000 eurosh, të nevojshme për kryerjen e operacionit të Hidajetit.
Pak pasi arriti në Turqi, Hidajeti iu nënshtrua operacionit, i cili zgjati për më shumë se 7 orë. Një ndërhyrje shumë delikate e cila fatmirësisht shkoi shumë mirë, e 18-vjeçari ndodhet në gjendje të mirë shëndetësore.
Bamirësia nuk të varfëron!
Për të dhënë kontributin tuaj për kauzat e “Fundjavë Ndryshe”, klikoni këtu.