Ish-presidenti i Kosovës, Behgjet Pacolli ka zhvilluar një vizitë në Qendrën e Solidaritetit, të fondacionit “Fundjavë Ndryshe”. I shoqëruar nga drejtuesi i fondacionit, Arbër Hajdari, filantropi i mirënjohur u prezantua me ambientet e qendrës më të madhe sociale në Ballkan.
Përmes një postimi në Facebook, Pacolli thotë se iu bë një pritje fisnike, teksa shprehet se u impresionua nga idetë dhe kreativiteti i themeluesit të fondacionit, Arbër Hajdari. Po ashtu Pacolli bën me dije për koordinim dhe bashkëpunim me “Fundjavë Ndryshe”.
“Sot isha në Qendrën humanitare “Fundjavë ndryshe” që drejtohet nga i riu, Arbër Hajdari për të koordinuar aktivitetet e përbashkëta me Fondacionin “Behgjet Pacolli”. Isha i impresionuar nga idetë dhe kreativiteti i tij. Me bënë nder me pritjen fisnike”, shkruan Pacolli.
Vizita nisi me mjediset e Qendrës Shëndetësore, e cila pritet të inagurohet së shpejti. Bibliotekën e re që do të hapet në shërbim të komunitetit, si edhe kapanonin e magazinimit, ku mblidhen ndihmat e donacionet.
Më pas, ish-presidenti i Kosovës ka zhvilluar edhe një takim me të rinjtë vullnetarë të “Fundjavë Ndryshe”. Në fund, Hajdari i ka dorëzuar Pacollit një medalje dhe certifikatë mirënjohjeje.
“Si drejtuesi i fondacionit i dorëzova medaljen dhe një certifikatë mirënjohje me motivacionin: Mirënjohje për Humanistin, Filantropin, Sipërmarrësin, Behgjet Isa Pacolli:
– për modelin unik dhe veprimtarinë shumëvjeçare në ndihmë të familjeve të varfra nëpërmjet krijimit të vendeve të punës dhe ndihmës humanitare në hapësirën kombëtare dhe jashtë vendit;
– për ndihmën ndaj familjeve të prekura nga tërmeti i Nëntorit 2019”.
Bamirësia nuk të varfëron!