Sigurimi i ndihmës ushqimore dhe materiale është një nga shtyllat kryesore të veprimtarisë së Fondacionit “Fundjavë Ndryshe”. Ky program adreson nevojat më urgjente të familjeve dhe individëve që përballen me vështirësi të thella ekonomike dhe sociale. Që prej vitit 2015, fondacioni ka zhvilluar aktivitete të vazhdueshme në të gjithë Shqipërinë, duke shpërndarë ndihma në mënyrë të organizuar dhe të qëndrueshme për mijëra familje në nevojë.
Ndihma ushqimore përfshin shpërndarjen e pakove me produkte bazike si miell, vaj, oriz, sheqer dhe artikuj të tjerë të domosdoshëm për jetesë, me qëllim që asnjë familje të mos mbetet pa ushqim.
Përveç ushqimit, fondacioni ofron edhe veshmbathje për të gjitha stinët, këpucë dhe produkte higjienike, duke ndihmuar veçanërisht fëmijët dhe të moshuarit të përballojnë kushtet e vështira të jetesës.
Ndihma materiale përfshin gjithashtu mobilje dhe pajisje shtëpiake, si dhe mbështetje për persona me aftësi të kufizuara.
Gjatë viteve të aktivitetit, fondacioni ka shpërndarë:
110,000 ton ushqime
48,872 pako veshmbathje
19,222 pako higjienike
3,211 karroca për persona me aftësi të kufizuara
Këto ndërhyrje kanë ndihmuar drejtpërdrejt në përmirësimin e kushteve të jetesës për mijëra familje në të gjithë vendin.
Pse ushqimi është prioritet
Në kushtet e varfërisë ekstreme, ushqimi është nevoja më bazike dhe më urgjente. Ai përfaqëson hapin e parë drejt stabilitetit për një familje në krizë.
Për këtë arsye, ndihma ushqimore është shpesh pika e nisjes në mbështetjen tonë, duke krijuar bazën për ndërhyrje të tjera më afatgjata.
Qasja e Fondacionit “Fundjavë Ndryshe” nuk ndalet tek ndihma e menjëhershme.
Pas sigurimit të nevojave bazike, ne vazhdojmë të punojmë me familjet në faza të tjera, duke i mbështetur në:
strehim , shëndetësi ,arsim
dhe mundësi për vetëpunësim
Qëllimi ynë është që familjet të dalin nga varfëria dhe të ndërtojnë një jetë të qëndrueshme dhe të pavarur.
Roli në situata emergjente
Në raste krizash si përmbytjet apo tërmetet, fondacioni mobilizohet menjëherë për të ofruar ndihmë urgjente.
Ndihmat përfshijnë:
Ushqime të konservuara ujë të pijshëm veshje dhe batanije materiale emergjente
Falë infrastrukturës dhe kapaciteteve logjistike, fondacioni është gjithmonë i përgatitur për të reaguar në kohë reale.